Se yakiniye Rayon Sports! Ibyo wamenya kuri Kirenga Saphine, Umuforomokazi wihebeye gukina sinema:INKURU

 0 total views

Uko iminsi yicuma niko umwuga wo gukina sinema utera imbere, Kirenga Saphine benshi batazira ‘Phina’ ni umwe mu bubatse izina muri uyu mwuga afatanya n’ubuganga.

Kuvuga ko ari umukinnyi mwiza kandi unakunzwe cyane, si ukumutaka gusa kuko ibihembo bya ‘Rwanda Movie Awards’ bitangirwa mu Rwanda amaze imyaka itatu yikurikiranya abyegukana nk’umukinnyi mwiza w’umugore muri sinema y’u Rwanda.

Mu kiganiro yagiranye na IGIHE uyu mukobwa yahishuye ko gukina sinema ari ibintu yatangiye akiri umwana atazi ko byazaba akazi nkuko uyu munsi bimwinjiriza.

Ubwo yari mu mashuri yisumbuye aho yize ‘Infirmière’, Kirenga nibwo yisanzemo impano yo gukina sinema, iya mbere yasohotse mu zo yakinnyemo yavuze ko ari ‘Amapingu y’Urukundo’ yagiye hanze mu 2012.

Ati “Filime ya mbere nakinnye iyo nyirebye mbona ko ntari nzi ibyo aribyo, iyo yari ‘Amapingu y’urukundo’ yasohotse mu 2012, ariko nta kundi yari intangiriro.”

Iyi filime yamenyekanye cyane yatumye aba icyamamare by’umwihariko ku ishuri aho yigaga, bikubitiyeho amafaranga icyo gihe bamuhembye arushaho gukunda sinema.

Kuva ubwo uyu mukobwa wari uri kwiga ubuganga, yatangiye gukurana urukundo rwa sinema kandi ahamya ko mu gihe amaze nta na kimwe cyica ikindi.

Ati “Ibintu byose rero iyo umaze kubikunda birikora, nta na rimwe ndasiba akazi ngo nagiye gukina filime. Nta nubwo ndasiba gukina kubera akazi. Ibintu byose bisaba kwiha gahunda nkamenya ibyo nkora n’igihe cyabyo.”

Icyakora kuba umuforomokazi ari n’icyamamare si ibintu byamworoheye kuko wasangaga abarwayi akenshi bajya aho ari kugira ngo bamuvugishe nk’umukinnyi bakunda aho kwivuza.

Gusa ngo uko iminsi yicumaga yagiye abimenyera kugeza ubwo kuri ubu asigaye yarabyakiriye.

Si we cyamamare gusa mu muryango w’iwabo, Ise yakiniye Rayon Sports n’Ikipe y’Igihugu Amavubi

Kirenga Saphine akomoka kuri Kirenga Louis wamenyekanye nk’umunyezamu w’ikipe y’Igihugu Amavubi aza no kugirira ibihe byiza mu ikipe ya Rayon Sports.

Kirenga Saphine avuga ko Se yitabye Imana akiri umwana cyane, ati “Nta byinshi muziho ariko bavuga ko twasaga ndetse hari n’imico ye ngaragaza, iyo mbyibutse binsubiza inyuma nkavuga ngo iyo mumenya.”

Avuga ko ikintu kimutera agahinda ari ukuba atarigeze akura arerwa na Se, kuba atamuzi neza byatumye uyu mukobwa asaba buri wese ufite amateka azi kuri Kirenga Louis kumwegera bakaganira gusa bikaba akarusho aramutse afite amafoto ye.

Ati “Buri wese uri kureba iki kiganiro yaba utuye mu Rwanda cyangwa hanze yarwo akaba afite amafoto ya Kirenga Louis azambabarire ayampe, n’iyo yayampa nkafataho ‘Copy’ nkamusubiza aye yaba akoze cyane.”

Bitewe n’uko Se yitabye Imana akina muri Rayon Sports, Kirenga Saphine yaje kuba umufana w’iyi kipe y’abambara ubururu n’umweru ndetse abarizwa muri itsinda ry’abakunzi bayo ryitwa ‘Seniors Gikundiro.

Kirenga Saphine ni umukinnyi wa filime ubihuza n’akazi k’ubuganga

Kirenga Saphine avuga ko nta na rimwe arica akazi ke kubera gukina filime cyangwa ngo yice ibyo gukina filime kubera akazi, ibi akaba abishobozwa no kwiha gahunda mu buzima

Kirenga Saphine yasabye buri wese uzi Se Kirenga Louis ko yamuha amafoto ye

Kirenga Saphine amaze kubaka izina nka Kantengwa muri filime ya ‘Seburikoko’

POSTED BY EMMY KURI RWANDAPAPARAZZI.RW/TV

 706 total views,  2 views today

Leave a Reply

Your email address will not be published.