ACP Lynder Nkuranga yagizwe Umuyobozi Mukuru w’Abinjira n’Abasohoka:INKURU>>

 0 total views

Perezida wa Repubulika y’u Rwanda Paul Kagame, yashyizeho abayobozi mu Rwego rw’Igihugu Rushinzwe Iperereza n’Umutekano (NISS), barimo ACP Lynder Nkuranga wagizwe Umuyobozi Mukuru w’Abinjira n’Abasohoka mu Gihugu (Director General of Immigration and Emigration), umwanya asimbuyeho Gatarayiha François Régis.

ACP Nkuranga ashyizwe kuri uyu mwanya, mu gihe Inama y’Abaminisitiri yateranye taliki 26 Kanama 2020, yari yamugize Umuyobozi mu rwego rw’Igihugu rushinzwe Iperereza n’Umutekano (NISS) ushinzwe Iperereza ryo hanze y’Igihugu.

Kuri izo nshingano yari amaze igihe kirenga umwaka arimo gukora, yazisimbuweho na Col Jean Paul Nyirubutama wagizwe Umunyabanga Mukuru wungirije muri NISS akaba n’Umuyobozi Mukuru ushinzwe Iperereza n’umutekano byo hanze y’Igihugu.

ACP Lynder Nkuranga yamenyekanye cyane mu itangazamakuru mu mwaka wa 2017 ubwo yari Umuvugizi wa Polisi wungirije ku rwego rw’Igihugu, icyo gihe yari yungirije Theos Badege. Muri icyo gihe, Lynder Nkuranga yari afite ipeti rya Chief Superintendent.

Muri Mutarama 2018, ubwo Perezida Kagame yazamuraga mu ntera abofisiye ba Polisi y’u Rwanda, yanazamuye Lynder Nkuranga, hamwe n’abandi bagore bagenzi be babiri Rose Muhisoni na Teddy Ruyenzi, bose bahawe ipeti rya Assistant Commissioners of Police (ACP). Iri ni ipeti rya kane rikomeye muri Polisi y’u Rwanda.

Perezida Kagame yashyize mu myanya abo bayobozi kuri uyu wa 6 Nzeri 2021, ashingiye ku biteganywa n’Itegeko Nshinga rya Repubulika y’u Rwanda ryo mu 2003 ryavuguruwe mu 2015, cyane cyane mu ngingo yaryo ya 112.

Yashingiye kandi ku ngingo ya 14 y’Itegeko No 73/2013 ryo ku wa 11/09/2013 rigena ububasha, inshingano, imiterere n’imikorere by’Urwego rw’Igihugu rushinzwe Iperereza n’Umutekano nk’uko ryahinduwe kandi ryujujwe kugeza ubu.

Posted by Emmy kuri Rwandapaparazzi.rw/tv

 306 total views,  14 views today

Leave a Reply

Your email address will not be published.