Jose Chameleone yahamagajwe n’urukiko kubera Imodoka yijije muri Uganda muburyo bwamanyaga:INKURU>>

 0 total views

Urukiko rushinzwe kurwanya ruswa muri Uganda rwahamagaje umuhanzi Joseph Mayanja wamamaye mu muziki nka Dr Jose Chameleone, aho ashinjwa kwinjiza imodoka mu gihugu mu buryo butemewe.

Ku rupapuro rusaba Chameleone kwitaba hagaragaraho ko ku wa 30 Nyakanga agomba kujya gutanga ibisobanuro kuri uru rukiko ruherereye mu gace ka Kololo.

Ari gukurikiranwaho kuzana ibicuruzwa mu gihugu bitanyuze kuri gasutamo, bikavugwa ko ari imodoka ye yavuye muri Sudani y’Epfo ikaza muri Uganda mu buryo bunyuranyije n’amategeko. Iyi modoka iri mu bwoko bwa Toyota Land Cruiser.

Ku rupapuro rumuhamagaza handitseho ko ‘Kugaragara ku rukiko kwawe ni ngombwa kugira ngo usubize ibijyanye n’ibyo uregwa byo kuzana ibicuruzwa bitanyuze kuri gasutamo, urasabwa na Guverinoma ya Uganda kuza ku rukiko rushinzwe kurwanya ruswa rwa Kololo ku wa 30 Nyakanga 2020 saa Tatu za mu gitondo.’

Uru rupapuro rugaragaza ko ku wa 12 Mata 2020, aribwo Ikigo Gishinzwe Imisoro muri Uganda (URA) cyavumbuye ko Jose Chameleone afite imodoka yinjiye mu gihugu ifite agaciro k’Amashilingi ya Uganda miliyoni 137 gihita kiyifata.

Uyu muhanzi yafatiwe muri Wakaliga-Bulange Mengo muri Kampala aho yasabwe ibyangombwa bijyanye n’iyi modoka akabibura.

Nyuma URA yatangaje ko uyu muhanzi atigeze yishyura imisoro yo kwinjiza iyi modoka mu gihugu nkana kandi yari azi ko itigeze yishyura n’imisoro yo kuri gasutamo. Araryozwa imisoro ya miliyoni enye z’Amashilingi ya Uganda.

Umuhanzi Jose Chameleone we yatangaje ko iyi modoka ari impano yahawe n’umufana we.

Jose Chameleone akurikiranyweho kwinjiza imodoka mu gihugu mu buryo butemewe

 

POSTED BY KABANDA JOSEPH KURI RWANDAPAPARAZZI.RW/TV

 810 total views,  16 views today

Leave a Reply

Your email address will not be published.