Madagascar yamaganye kure abanega umuti wa coronavirus kuko wakorewe muri Afurika:INKURUURU
Perezida wa Madagascar, Andry Rajoelina, yavuze ko impamvu umuti uvugwaho kuvura coronavirus wakorewe mu gihugu cye, abanyamahanga bakomeje kuwamagana ari uko uturuka muri Afurika.

Igihugu cya Madagascar kimaze iminsi mu bukangurambaga bw’umuti cyakoze witwaCOVID-Organics, aho cyemeza ko uvura ukanarinda uwawukoresheje kwandura coronavirus.

Ntabwo uwo muti uremezwa n’umuryango mpuzamahanga wita ku Buzima (OMS) ariko byinshi mu bihugu bya Afurika bikomeje kuwusaba ngo biwifashishe mu kuvura abarwayi ba coronavirus.

Mu kiganiro Andry Rajoelina yagiranye na France 24, yavuze ko impungenge zose zigifitwe kuri uwo muti ariko wavumburiwe muri Afurika, ati “iyo uba wavumburiwe mu Burayi, ubu nta mpungenge ziba zihari.”

Andry Rajoelina yavuze ko umuti igihugu cye cyavumbuye bawizeye neza kandi abawukoresheje bakira.

Ati “Abarwayi bawukoresheje bagaragaje koroherewa mu masaha 24 gusa. Mu minsi irindwi cyangwa icumi umurwayi aba yakize kandi ni umuti w’umwimerere, nta burozi burimo.”

Yavuze ko guhorana impungenge no gushidikanya ku byakorewe muri Afurika bikwiriye guhagarara.

Ati “Ese iyo kiza kuba igihugu cy’i Burayi cyawuvumbuye, haba hari impungenge? Siko mbitekereza. Ikibazo ni uko uva muri Afurika. Bati ntitwakwemera ko igihugu nka Madagascar kiri ku mwanya wa 63 mu bikennye ku isi gikora umuti wakiza isi.”

Uyu muti wa Madagascar uturuka mu kimera cyitwa artemisia gisanzwe cyifashishwa mu gukora umuti uvura malariya.

Andry Rajoelina yavuze ko umuti wa coronavirus iyo uza kuvumburwa n’igihugu cy’i Burayi benshi bari kumva ko wujuje ubuziranenge, nyamara uwo muri Afurika ukanenwa

 

POSTED BY EMMY KURI RWANDAPAPARAZI.RW/TV

Leave a Reply

Your email address will not be published.