Hari Bamwe bahisemo kwiturira mu biti mu rwego rwo kwirinda COVID-19:INKURU>>

Bamwe mu baturage b’igihugu cy’Ubuhinde baretse kuba mu ngo zabo bajya kwiturira mu biti, mu rwego rwo kwirinda ikwirakwira ry’icyorezo cya Virusi ya Corona.

BBC ivuga ko abahisemo kujya kwibera mu biti nk’akato ari abo mu giturage cya Vangidi, mu karere ka Balarampur ho muri Bengal y’Uburengerazuba; nyuma yo kugera iwabo bavuye mu mujyi wa Chennai.

Impamvu ngo ni uko inzu zabo ari nto, zikaba zidafite ubushobozi bwo kubarinda guhura n’abavandimwe babo bifuza kutanduzanya Coronavirus, impamvu bahisemo kwishyira mu kato k’iminsi 14 bagomba kumara mu biti.

Abaganiriye na Times of India bavuga ko ubwo bavaga gupagasa mu mujyi wa Chennai, bahisemo kwibera mu biti nyuma yo kugirwa inama n’abaganga y’uko bagomba kumara iminsi 14 mu kato.

Uwitwa Bijoy Sing Laya yagize ati” Twavuye i Chennai. Twanyuze i Berhampur dukoresheje imodoka. Ubu tumeze neza hano. Abaganga batubwiye ko tugomba kuguma mu kato mu rugo iminsi 14 kandi tugakomeza kwitarura abandi. Iwacu mu rugo ntidufite ibyumba biduhagije kandi abaturage bacu bemeje ko tuguma hano (mu biti).”

Yakomeje agira ati” Ubu turi twenyine, tuzaguma hano neza twubahiriza amabwiriza yose. Mu gitondo duhererwa ifunguro rya mu gitondo hano. Saa sita na nimugoroba, duhabwa umuceri. Amazi na yo araboneka hano hamwe n’ibiryo. Natwe tugira amashyiga yo gutekaho amazi n’ibyo kurya.”

Magingo aya Abahinde bari muri gahunda yo kuguma mu ngo zabo igomba kumara iminsi 21, nyuma y’amabwiriza yatanzwe na Minisitiri w’Intebe Narendra Modi.

Ni igihe cyashyizweho mu gihe iki gihugu gituwe n’abarenga miliyari imwe n’igice kitugarijwe cyane na Coronavirus, kuko imaze guhitana abantu 72 mu barenga gato 2,500 bayanduye.

POSTED BY UWINEZA VANESSA  KURI RWANDAPAPARAZZI.RW/TV

 8 total views,  6 views today

Leave a Reply

Your email address will not be published.