Ama-Robot ni yo ari kugenzura ko abantu bubahirije gahunda ya guma murugo, aho ni muri Tunisia:amafoto>>

Imashini zizwi nk’ama Robot zakwirakwijwe mu bice by’umurwa mukuru wa Tunisia, Tunis, ku irondo ryo kugenzura ishyirwa mu bikorwa ry’amabwiriza yo kuguma mu ngo, nk’imwe mu ngamba zo gukumira ikwirakwira ry’icyorezo cya Virusi ya Corona.

Izi robot zidasanzwe zizwi nka PGuards zashyizweho na Minisiteri y’umutekano w’imbere muri kiriya gihugu, mu rwego rwo kwirinda ingendo zitemewe.

Nta wuzi umubare w’izakwirakwijwe mu murwa mukuru wa Tunisia.
Iyo zibonye umuntu ugendagenda mu mihanda ya Tunis, ziramwegera zikamubaza impamvu yasohotse iwe mu rugo.

BBC ivuga ko abahuye na ziriya robot zifite amapine azifasha kugenda, bereka indangamuntu zabo imfatamashusho iziteyeho kugira ngo Abapolisi bashinzwe kuzigenzura basuzume ibyo byangombwa.

Magingo aya ibyumweru bibaye bibiri Abanya-Tunisia bategetswe kuguma mu ngo zabo, mu rwego rwo kwirinda ikwirakwira ry’icyorezo cya Virusi ya Corona.

Cyakora cyo abakeneye serivisi zibutirwa nk’iz’ubuvuzi bemererwa gutambuka.

Mu kavidewo kashyizwe ku mbuga nkoranyambaga, kagaragaramo umugabo wagendagendaga mu muhanda, hanyuma ahuye n’iyo robot imuhagarika imubaza aho agiye.

Umugabo yumvikana asubiza Robot ko agiye kugura isigara, na yo imusubiza igira iti” Ok, cyo ngaho gura isigara zawe, ariko wihutire gusubira mu rugo.”

Ikigo cyitwa Enova Robotics cyazikoze, cyabwiye BBC y’uko zizewe, gusa cyirinda guhishura akayabo imwe muri zo ishobora kuba igura.

Muri Tunisia harabarurwa abantu 14 bamaze guhitanwa n’icyorezo cya Virusi ya Corona, mu gihe abacyanduye ari 436.

POSTED BY EMMY KURI RWANDAPAPARAZZI.RW/TV

 6 total views,  6 views today

Leave a Reply

Your email address will not be published.