Uganda iravuga ko ishaka umutarage wayo waburiye mu Rwanda!! INKURU>>

Leta ya Uganda binyuze muri Minisiteri yayo y’ububanyi n’amahanga, yandikiye u Rwanda irusaba kuyirangira aho umuturage wayo bivugwa ko yaburiye mu Rwanda aherereye, mu gihe ikeka ko ashobora kuba afungiye muri imwe mu magereza yo mu mujyi wa Kigali.

Uwo Uganda ibaza u Rwanda yitwa Ivan Peter Egessa, akaba ari inzobere mu bijyanye n’ikoranabuhanga yakoreraga mu Rwanda. Leta ya Uganda binyuze muri Minisiteri y’ububanyi n’amahanga yayo, ivuga ko Egessa yaburiwe irengero ku wa 08 Ukuboza 2019, dore ko ari bwo aheruka kuvugana n’umuryango we.

Okello Oryem, umunyamabanga wa leta muri Minisiteri y’ububanyi n’amahanga muri Uganda, yabwiye Daily Monitor ko bamaze kwandikira u Rwanda barusaba kubabwira aho uriya muntu aherereye, gusa bakaba batarahabwa igisubizo.

Ati:“Minisiteri yanjye yamaze kwandikira kwandikira Minisiteri y’ububanyi n’amahanga y’u Rwanda binyuze muri Ambasaderi wacu mu Rwanda, tubasaba kudufasha kumenya aho umuturage wacu dukeka ko ari mu Rwanda ashobora kuba aherereye.

Ivan Peter Egessa w’imyaka 32 y’amavuko, kuva muri 2015 yakoreraga mu Rwanda aho yubakaga akanasana imiyoboro na applications za mudasobwa. Yaburiye mu mujyi wa Kigali mu Ukuboza umwaka ushize, amakuru akavuga ko yatwawe n’inzego z’umutekano z’u Rwanda zimujyana ahantu hatazwi.

Nta n’umwe mu muryango we cyangwa inshuti ze za hafi ngo uzi aho ashobora kuba aherereye.

Egessa yiyongereye mu mubano w’u Rwanda na Uganda, mu gihe usanzwe utifashe neza.Nta kimenyetso kigaragaza ko uyu mwuka ushobora kongera kuba mwiza, dore ko umaze gushegesha cyane ubuhahirane bw’ibihugu byombi.

Mu gihe Uganda iburana ko hari umuntu wayo waburiye mu Rwanda, leta y’u Rwanda na yo yemeza ko hari abantu bayo benshi bafungiye mu magereza atazwi muri Uganda, akaba ari na bo ikomeje gusaba ko barekurwa kugira ngo hafungurwe imipaka igabanya ibihugu byombi.

Ubwo abayobozi ku mpande zombi bari bahuriye i Kigali muri Nzeri umwaka ushize mu rwego rwo gusuzumira hamwe ishyirwa mu bikorwa ry’amasezerano ya Luanda, umwe mu myanzuronama wafashwe wari uko Uganda yagombaga koherereza u Rwanda Abanyarwanda bahafungiye ariko kugeza na n’ubu ikaba itarabohereza.

Bwiza.com

POSTED BY EMMY KURI RWANDAPAPARAZZI.RW/TV

Leave a Reply

Your email address will not be published.