Umugabo yibye imyambaro ya gisirikare kugirango ajye ayambara ateze moto cyagwa imodoka ngo ntiyishyuzwe:AMAFOTO>>

Umuturage witwa James Mwanateba w’imyaka 40 y’amavuko utuye mu mugi wa Dar es Salaam muri Tanzania yafashwe yambaye imyenda y’igisirikare cy’igihugu, bivugwa ko yari agamije kujya akora ingendo mu modoka atishyuye.

Aya makuru dukesha East African TV avuga ko Mwanateba yafashwe n’abapolisi b’abasirikare (Military Police) uyu munsi tariki ya 13 Mutarama 2020, mu gace ka Songwe.

Ni ibintu bidasanzwe kumva umuturage utinyuka akambara impuzankano ya gisirikare ku manywa y’ihangu, akayifata nk’igikangisho muri rubanda. Hari ubwo byumvikana ngo runaka yatawe muri yombi, ashinjwa kwiyitirira polisi ariko ntibigera aho kwambara imyambaro yabo.

Ibyo kwiyitirira polisi y’igihugu byarabaye mu bihugu birimo u Rwanda, ubwo muri Werurwe 2018 umuturage w’imyaka 49 yafatiwe mu karere ka Ngororero, akurikiranwaho ubwambuzi bushukana, abeshya ko ari umupolisi. Uyu mugabo yabeshye umuturage ko azafunguza umwana we wari ufunzwe, amusaba amafaranga kugira ngo azabikore.

Mu minsi ishize na none mu karere ka Ngoma mu Burasirazuba bw’igihugu, uwiyitaga umukozi w’Urwego rw’Igihugu rw’Ubugenzacyaha n’umupolisi yatawe muri yombi. Ibi yabigiraga iturufu akambura abaturage, kimwe n’undi wigize umupolisi watawe muri yombi tariki ya 6 Mutarama 2020, akurikiranweho kwaka umumotari ibyangombwa mu karere ka Gasabo.

POSTED BY KAGABO DEO KURI RWANDAPAPARAZZI.RW/ KGLI

Leave a Reply

Your email address will not be published.