Amaze iminsi yarataye urugo bitewe n’umugore wazanyemo undi mugabo rwe:INKURU>>

Dusabimana Felicien wo mu murenge wa Remera mu karere ka Musanze, amaze iminsi itatu yarahunze urugo rwe kubera kutumvikana n’umugore we ku mugabo bivugwa ko yari yaraje kuba iwabo mu rugo azanwe n’umugore.

Magingo aya yaba uyu mugore, abaturanyi cyangwa abo mu muryango w’uriya mugabo nta n’umwe uzi aho aherereye kuva yahunga urugo rwe ku wa gatanu w’icyumweru gishize.

Banteziminsi Angela, nyina wa Dusabimana, yahamirije umunyamakuru wa Bwiza ko umuhungu we yafashe icyemezo cyo gutorongera, kubera kugirwa inganzwa n’umugore we bikagera n’aho azana mu rugo rwe undi mugabo byemezwa ko yari yaje kumusimbura.

Uyu mukecuru avuga ko umuhungu we yari asanzwe ahohoterwa, dore ko yanagaragarije Bwiza.com ifoto igaragaza Dusabimana afite igikomere kinini ku rutugu, akemeza ko iyi foto yafatiwe kuri station ya Polisi ya Remera nyuma y’uko uyu mugabo yari yarumwe n’umugore we ndetse akanamukurura imyanya y’ibanga.

Bwiza.com yanashoboye kubona kopi y’inyandiko yakozwe n’ubuyobozi bw’akagari ka Murandi Polisi, igaragaza ko Dusabimana yigeze gukubitwa n’umugore akanakururwa imyanya y’ibanga nyuma y’inzira y’umusaraba yagiye anyuzwamo n’uwo bashakanye.

Iyi nyandiko igaragaza uburyo Dusabimana yahohotewe n’umugore

Abaturanyi b’uriya muryango na bo ntibahwema gushimangira ko Dusabimana Felcien yahohoterwaga n’umugore we, afatanyije n’urubyaro rwabo.

Umuyobozi w’umudugudu wa Buhogo uyu muryango utuyemo, Bwana Gakwenza Aimable yemeza ko umugabo uvugwa kuba intandaro yo kugira ngo Dusabimana ate urugo rwe yari ahamaze ibyumweru bibiri, gusa bikaba ngombwa ko bamutegeka kuruvamo.

Gakwenza anemeza ko hashize igihe kirekire Dusabimana n’umugore we badacana uwaka, amakimbirane yabo ahanini akaba ashingiye ku kuba umugore ari we ufite imitungo myinshi kurusha umugabo we, ibintu byanatumye umugabo we agirwa umwana nk’abandi bose.

Banyangandora Eugenie ushinjwa kwangaza umugabo we, avuga ko umugabo bivugwa ko yari yashimbuje umugabo we yamaze iwabo ibyumweru bibiri, gusa akemeza ko ari umushyitsi wari waturutse i Nyanza mu majyepfo y’u Rwanda aje gushaka ikibanza muri ako gace.

Ku bivugwa by’uko yaba yari asanzwe ahohotera umugabo we ndetse akaba yaranigeze kumukomeretsa no kumukurura imyanya y’ibanga, Banyangandora avuga ko yakomerekeje umugabo we ubwo barwanaga ashaka kumufata ku ngufu, gusa akaba ahakana ibyo kumukurura igitsina.

Umunyamabanga nshingwabikorwa w’agateganyo w’umurenge wa Remera, Uwitije Marie Alice, yemereye Bwiza.com ko amakimbirane yo muri uriya muryango asanzwe azwi, ndetse bakaba baragerageje kuwunga ariko bikananirana.

Ati: “Baganirijwe incuro nyinshi, ikibazo cyabo nacyakiriye nk’umuyobozi ushinzwe irangamimerere ndetse n’umuyobozi w’umurenge wari uhari twabaganirije kenshi gashoboka, bigera n’aho duhamagara Pasiteri ngo abigishe mu bafitanye amakimbirane.”

Uwitije avuga ko ku bufatanye n’abanyamadini bagiye gukomeza kwigisha uyu muryango n’indi imeze nka wo kugira ngo ikibazo cy’amakimbirane gishakirwe umuti, bakwanga guhinduka bakanigishwa n’amategeko aho kugira ngo bamwe bazicane.

POSTED BY EMMY KURI RWANDAPAPARAZZI.RW/TV

Leave a Reply

Your email address will not be published.