Rwamugeze amajanja, biba nibura Gatatu- Umuryango wa Ben Rutabana umuvugaho:INKURU>>

Umuryango wa Benjamin Rutabana urimo kumutabariza nyuma y’amezi abiri aburiwe irengero, wahishuye ko urupfu rumaze kumugera amajanja inshuro eshatu.

 

Kuva ku itariki 8 Nzeri 2019, nibwo umuryango wa Benjamin [Ben Rutabana] utongeye kumenya iby’amakuru ye ubwo yari yageze ku butaka bwa Uganda amaze iminsi Ine avuye aho aba mu Bubiligi.

Nyuma yo gushakisha amakuru ye hirya no hino ariko ukayoberwa irengero rye amezi abiri akaba ashize, nibwo washyizeho uburyo bwo kumushakisha wifashishije imbuga za Internet “Tabara Rutabana, Tabariza Rutabana” ndetse na #Freeben Rutabana kuri twitter, bivuze ’Ben Rutabana narekurwe’.

Umuryango we washyizeho uru rubuga ku murongo wa Internet ’Tabariza Rutabana’, wanahishuye ko Ben Rutabana ufite imyaka 49 y’amavuko, ubu aho ari ukeka ko ari mu makuba, ari ku nshuro ya Gatatu urupfu rwaba rumugeze amajanja.

Wagize uyi “Asa n’akanyana kazabyara amashyo kavumera kakivuka. Nyamara kuva akivuka, rwamugeze amajanja, biba nibura gatatu. Rutabana yarabuze kuva ku italiki 8 Nzeri 2019, dufashe umuryango we mu buryo bufatike mu rwego rwo kumushakisha”.

Mu 1990 ubwo Rutabana yari ageze mu mwaka wa nyuma w’ amashuri yisumbuye, yarafashwe maze arafungwa ashinjwa kuba icyitso cya FPR-Inkotanyi, aza kurekurwa muri Werurwe 1991, yahise yerekeza muri FPR mu Burundi nyuma aza no kujya muri Uganda kubera akababaro yari yatewe na Leta yari iriho yifatanya n’abandi mu rugamba rwo kubohora igihugu.

Rutabana waje guhunga igihugu nyuma y’urugamba rwo kwibohora, ubu abarizwa mu ihuriro rya RNC ritavuga rumwe na Leta y’u Rwanda. Amakuru atangazwa n’ibinyamakuru bitandukanye ndetse yanakomojweho n’umufasha we, Diane Rutabana, avuga ko ubwo yerekezaga muri Uganda yari amaze iminsi afitanye ibibazo na muramu we, Kayumba Nyamwasa ari na we muyobozi mukuru w’iri huriro [RNC].

Umuryango we uvuga ko kuri iyi ncuro rwaba rurimo kumugera amajanja, ugaruka cyane ku ifatwa rye nk’aho abayobozi ba RNC ndetse na Leta ya Uganda ibifitemo uruhare.

Aha wagize uti “Nibwo agiye mu Ihuriro ngo ry’Abasangirangendo, ryitwa RNC (Rwanda National Congress). Ese iryo huriro ni Ihuro cyangwa se ni Ihurizo? Niba atari ihurizo ni ryerure rivuge ko ritamumize, ko indwara y’u Rwanda itazaba karande. Niba agihumeka, niriduhumurize, Rutabana atahe, twemere Itahuka”.

Ben Rutabana muri Uganda

Diane Rutabana yabwiye BBC ko abayobozi n’abayoboke ba RNC bagiye bamuha amakuru atandukanye, amwe avuguruzanya, ku ibura ry’umugabo we.

Madamu Rutabana ati: “Nyuma nabazaga bamwe bakambwira ngo ni ikibazo cy’umutekano ariko aho ari bazi ko ameze neza. Ayo ni amakuru nahawe n’abantu bane bo muri RNC.

Bucyeye bwaho undi wo muri RNC arampamagara arambwira ngo yatumwe n’uwo muyobozi wabo ngo ’Kayumba [Nyamwasa] yambwiye ngo nkuvugishe nguhumurize”.

Madamu Rutabana avuga ko hari ibyavuzwe mbere ko Ben Rutabana nasubira muri Uganda azafungwa, ati: “Abo ni abantu bo muri RNC babivuze kandi ntabwo babivuze mu ibanga”.

Mushiki wa Benjamin Rutabana, Tabitha Gwiza mu cyumweru gishize aganira na VOA, na we yakoresheje imvugo ica amarenga ko umuryango waba uzi aho ari.

Umunyamakuru amubajije ati “Nta kanunu mufite k’abamufite? Tabitha yasubije agira ati “Nta kanunu dufite ariko hari umugani w’Ikinyarwanda uvuga uti ’Ntawe uyoberwa umwibye ahubwo ayoberwa aho amuhishe, ntabwo bizatinda icyo tuzamenya tuzakibashyirira ku Karubanda”.

Ikinyamakuru The New Times cyatangaje ko ubwo Rutabana yageraga muri Uganda yakiriwe na Dr. Sam Ruvuma, umunyamuryango ukomeye muri RNC, n’abofisiye bo mu rwego rw’iperereza rwa gisirikare muri Uganda, CMI. Gusa ku wa 8 Nzeri 2018, umuryango wa Rutabana uvuga ko utongeye kuvugana nawe.

Ben Rutabana ubu ukomeje gushakishwa asanzwe ari komiseri muri RNC ushinzwe kongera ubushobozi. Nyuma y’urugamba rwo kubohora igihugu, mu 1995 nibwo yavuye mu gisirikare afite ipeti rya “Su-Liyetona”. Mu 2004 yerekeje mu gihugu cy’ u Bufaransa mu rwego rwo gukomeza kumenyekanisha umuziki we, agezeyo ngo yiyita impunzi.

POSTED BY EMMY KURI RWANDAPAPARAZZI.RW KGLI

Leave a Reply

Your email address will not be published.