Rayon Sports yasinyishije rutahizamu Rharb Youssef wakiniraga Raja Casablanca yo muri Maroc ku masezerano y’umwaka umwe.

Rharb Youssef w’imyaka 21, yari amaze imyaka ibiri gusa akinira ikipe ya mbere ya Raja Casablanca.

Rharb Youssef yabaye umukinnyi wa gatatu usinyishijwe na Rayon Sports kuri uyu wa Gatandatu nyuma ya Ayoub Ait Lahssaine bakomoka hamwe, ariko we wasinye nk’intizanyo ya Raja Casablanca ndetse n’Umunya-Cameroun Essombe Willy Onana wasinye imyaka ibiri nyuma yo gutsinda igeragezwa.

Rayon Sports na Raja Casablanca zifitanye ubufatanye buzamara imyaka itatu kuva muri Nyakanga 2021.

Bukubiyemo ko Raja Casablanca izajya itiza abakinnyi Rayon Sports, ikayifasha mu bikorwaremezo, gukorera umwiherero muri Maroc, kongera imbaraga mu buvuzi, kuzamura impano ku ngimbi z’iyi kipe yaboneye izuba i Nyanza, imikino ya gicuti, ibijyanye n’ikoranabuhanga n’ibindi.

Abandi bakinnyi bashya baguzwe mu minsi ishize ni Mitima Isaac, Muvandimwe Jean Marie Vianney, Byumvuhore Trésor, Mugisha François ‘Master’, Mushimiyimana Mohamed, Hategekimana Bonheur, Nsengiyumva Isaac na Mico Justin.

Nizigiyimana Karim ‘Mackenzie’, Muntore Jean Pipi, Sanogo Souleyman, Nwosu Samuel Chukwudi, Bright Karley Appenkro, Sembi Hassan na Mumbele Saiba Claude bari mu bakinnyi bakiri mu igeragezwa.

Nyuma yo gutsinda Musanze FC igitego 1-0 mu mukino wa gicuti wabaye ku wa Gatanu, Rayon Sports izakina undi izakirwamo na AS Muhanga ku Cyumweru.

Youssef Rharb yasinye umwaka umwe muri Rayon Sports

 946,355 total views,  910 views today