Templates by BIGtheme NET
Posted on 28/8/2016
Posted on 28/08/2016

UBUHAMYA: bamwiciye umugabo muri Jenoside batarabyarana, ayirokotse yihebera kurera imfubyi

Nyuma yo kwicirwa umugabo bari bamaranye igihe gito n’abo mu muryango we muri Jenoside yakorewe Abatutsi muri Mata 1994, Umuteteri Marie Théogène, yihebeye kurera abana biciwe ababyeyi muri Jenoside n’abandi batari bafite kivurira.

Jenoside yakorewe Abatutsi 1994, yiciwemo benshi mu bo mu muryango wa Umuteteri wari ufite imyaka 32 y’amavuko. Nyuma yo kubura umugabo we bari batarabyarana, yanzuye kutongera gushaka ahubwo atangira urugendo rwo kurera abana b’imfubyi muri SOS.

Mu mvugo yuzuyemo ikiniga, amarira asa n’amuzenga mu maso mu buhamya bwe agaruka cyane ku mugabo we bakundanaga, bakanateteshanya cyane, akaba ari nawe yakomoyeho impano yo gukunda abana b’imfubyi.

Yagize ati “Jenoside itangira nari kumwe n’umugabo wanjye na baramu be babiri, mukeba wanjye n’abana be batatu hari n’undi muhungu yari abereye se wabo. Interahamwe zaraje zica uwitwa umugabo wese wari uri mu rugo, nsigarana na mukeba wanjye n’abo bana be. Twahungiye mu bitaro byitiriwe Umwami Faisal tuhamara ibyumweru bibiri, Inkotanyi nizo zahadukuye zitujyana i Byumba.”

Umuteteri atangira kurera imfubyi zarariraga nawe akarira

Umuteteri avuga ko umugabo we bakimara kumwica, yakomeje guhigwa n’interahamwe, ku bw’amahirwe ahungishirizwa n’Ingabo zari iza RPF i Byumba. Aha yahasanze abagore bakoranaga n’umugabo we muri SOS bamusaba kubafasha kurera imfubyi zabaga muri icyo kigo n’abandi bahazanwaga.

Yagize ati “Tugeze i Byumba nahindutse umubyeyi w’abana benshi bababaye n’ubwo nanjye ntari norohewe; barariraga nanjye nkarira. Igihe cyaje kugera amarira yanjye arakama kubera uburyo nabonaga abana bari batemaguwe, bafite ibikomere ku mubiri no ku mutima, byansabaga gukomera kugira ngo mbashe kubahoza.”

Umuteteri ashimangira ko mu mibanire ye n’umugabo we ariho hashibutse urukundo rwatumye yitangira gukikira no kurera ibibondo birimo ibyagizweho ingaruka na Jenoside yakorewe Abatutsi.

Yagize ati “Umugabo wanjye kubera ko yakoraga mu kigo cy’imfubyi yajyaga abazana mu rugo ari benshi bakadusura, yakundaga imfubyi cyane. Nanjye yarabindaze kandi niyemeje kutazamuhemukira nicyo cyatumye ntongera gushaka umugabo n’ubwo hari benshi bandambagizaga.”

Umuteteri asobanura ko amarira y’abana bagizwe imfubyi na Jenoside, yibagiwe agahinda ke, kugira ngo abashe kuba umubyeyi ubizihiye.

Ati ‘‘Numvaga kurera abo bana ntazabimaramo imyaka ibiri, bari abana bafite ibisebe, bameze nabi cyane, ariko gahoro gahoro uko bagenda baza bansanga banyita ‘Mama’ bansekera, banyiteteshaho byaranyubatse bituma icyemezo cyo kubasiga nari mfite gihinduka.”

 

Umuteteri Marie Théogène afite amateka ashingiye ku neza yashibutse mu bikomere yagiriye muri Jenoside yakorewe Abatutsi muri Mata 1994

“Umuteteri utaragize amahirwe yo kubyara, ubu ni nyina w’abana 32”

Umuteteri avuga ko atewe ishema no kuba kuri ubu hari abana 32 bamwita ‘Mama’ n’abuzukuru bamwita nyogokuru.

Yagize ati ‘‘Abana bato nareze ni abakobwa b’impanga bari bafite ukwezi kumwe, ubu ni inkumi biga muri Ghana. Abandi bazaga bafite guhera ku mwaka umwe kuzamura. Mu biganza byanjye hamaze kunyura abana 32, nashyingiyemo batatu hari n’undi nzashyingira mu kwezi kwa gatanu. Ubu mfite abuzukuru, mfite abakwe n’abakazana, ku buryo rwose numva nishimye cyane iyo mbabona bakura batera imbere.’’

Umuteteri warokotse Jenoside yahaye abagore bapfakajwe na Jenoside ubutumwa bwo gukomeza kubakira kuba intwari.

Yagize ati ‘‘Bagomba guharanira ishema, bakanga agasuzuguro. Ni ibintu bikomeye ariko kandi iyo byose ubifatanyije no gusenga Imana iguha imbaraga kandi ugatera intambwe umunsi ku munsi, ikakurinda kwandavura.”

Umuteteri n’umugabo we mu gihe cya Jenoside yakorewe Abatutsi muri Mata 1994 bari batuye Gacuriro ubu ni mu Karere ka Gasabo.

 

Umuteteri yabuze umugabo we n’abo mu muryango we muri Jenoside yakorewe Abatutsi muri Mata 1994

 

Umuteteri wari ufite intimba n’agahinda ku mutima yagize ishyaka ryo kurera abana b’imfubyi muri SOS Kacyiru aho yakikiye ku bibero bye 32
Emery@Rwandapaparazzi.rw

35,908 total views, 50 views today

About Rwanda Paparazzi

RwandaPaparazzi Author

ăn dặm kiểu NhậtResponsive WordPress Themenhà cấp 4 nông thônthời trang trẻ emgiày cao gótshop giày nữdownload wordpress pluginsmẫu biệt thự đẹpepichouseáo sơ mi nữhouse beautiful