Templates by BIGtheme NET
Posted on 28/8/2016
Posted on 28/08/2016

Amateka y’umusozi Nzaratsi wiswe ‘Kaluvari’ nyuma ya Jenoside yakorewe Abatutsi

Ubusanzwe abakirisitu n’abakunze gusoma Bibiliya bazi ‘Kaluvari’ cyangwa ‘Gologota’, nk’umusozi uherereye inyuma y’Umujyi wa Yeruzalemu, wicirwaho abagome, ibisambo, abagizi ba nabi n’abigometse ku butegetsi bw’Abaroma , akaba ari naho Yezu yaje kwicirwa urw’agashinyaguko akanabambwa ku musaraba.

Kimwe n’ahandi mu Rwanda Jenoside itangira, Abatutsi bo ku musozi witwaga Nzaratsi, baratotejwe baricwa mu buryo bwa kinyamaswa.

Ibyabaye ku bahungiye ku musozi wa Nzaratsi, uherereye mu Kagari ka Mayunzwe, umurenge wa Mbuye, byatumye uhita uhabwa izina ‘Kaluvari’.

Mu bashesha akanguhe batuye mu nkengero zawo baganiriye na IGIHE, nta n’umwe wasobanuye imvano y’izina Nzaratsi kuko bahuriza ku kuba barabyirutse basanga witwa uko, ahubwo bahuriza ku nzira y’umusaraba Abatutsi bawukoreshejweho bicwa urw’agashinyaguro.

Umwe mu baharokoke witwa Niyibaho Gérard yagize ati “Natwe turacyabaririza impamvu bahise Nzaratsi.”

Yakomeje asobanura uburyo bawubabarijweho, bikaza gutuma bawita Kaluvari, bagerenanyije ububabare Yezu yababarijwe kuri uwo musozi n’ibibi byawukorerwagaho.

Yagize ati “Twabanje guhungira hariya hejuru i Nzaratsi, tuhahungiye abantu baturutse ruguru baza kudutega twerekeza i Kabgayi, ku buryo baje kudutega, batubwira ko no mu Ruhango naho bahiciye abandi, tubura uko tubigenza, twerekeza mu Byimana (ku wundi musozi) banga kutwakira. Nagarukanye n’abandi benshi barimo abagore, umugore wanjye niho bamwiciye, umwana bari kumwe nsanga bamuteye ibyuma.”

Yongeye ati “Hariya Nzaratsi impamvu bahise Kaluvari, kari agashinyaguro. Bazaganaga abihishe mu bihugu ntibabice burundu, bakabazamura nk’iminsi itatu bakibashinyagurira. Ubundu bahabazamuraga bamwe bikoreye Bibiliya. Mbese twahababariye nk’uko Yezu yababajwe, urupfu yishwe nirwo twishwe. Niyo mpamvu bahise Kaluvari.”

Komiseri ushinzwe ibikorwa byo kwibuka mu Murenge wa Mbuye, Belgique Edouard, yagize ati “Nk’uko byagenze mu gihugu hose n’aha kuri uyu musozi witwaga Nzaratsi dore ko hano i Mayunzwe hari hatuye abatutsi benshi, habereye ubwicanyi bukabije. Igihe cyarageze baricwa barimo abaturukaga za Bugesera bahunga bajya za Kabgayi benshi baguye hano.”

Yongeye ati “Babajugunyaga mu rwobo bareba, bakarenzaho itaka batapfuye, hari abo bashinyaguriraga bakabaca ibice by’imibiri, abo bateraga ibisongo. Yewe, babishe urupfu rubi.”

Abatuye kuri uwo musozi, bavuga ko ubibutsa byinshi ku mateka yaranze u Rwanda mu gihe cya Jenoside gusa ngo byabaye amateka kuko ubu biyubatse bakigobotora amateka n’ingoma yaranzwe n’amacakubiri, yatumye abatutsi barenga miliyoni bicwa mu gihe cy’amezi atatu.

Kuri uwo musozi, ubu hubatswe urwibutso rwatangiye kwimurirwamo imibiri y’abatutsi biciwe hirya no hino mu Karere harimo n’iyari ishyinguye muri shitingi, mu rwibutso rwari ruhari.

Umusozi witwaga Nzaratsi

Imisozi ikikije Nzaratsi yaturukagamo abatutsi bajyanywe kxwicirwayo

Urwibutso rwabanje kubakwa

Urwibutso rushya rwatangiye kwimurirwamo imibiri y’Abatutsi yari ishyinguye muri shitingi

Umwe mu barokokeye ku musozi wa Nzaratsi, Niyibaho Gerard ntaramenya inkomoko y’izina ry’uyu musozi

16,170 total views, 100 views today

About Rwanda Paparazzi

RwandaPaparazzi Author

ăn dặm kiểu NhậtResponsive WordPress Themenhà cấp 4 nông thônthời trang trẻ emgiày cao gótshop giày nữdownload wordpress pluginsmẫu biệt thự đẹpepichouseáo sơ mi nữhouse beautiful