Templates by BIGtheme NET
Posted on 28/8/2016
Posted on 28/08/2016

Dore Uko Wakwitwara Mu Gihe umukunzi Wawe Yafashwe n’ Uburwayi ushaka kumugusha neza “REBA HANO”

Nubwo abakundana iyo bagiye kubana basezerana kubana akaramata mu bibi no mu byiza, baba barwaye cyangwa ari bazima, burya ukuri ni uko akenshi ariya magambo iyo bayavuga badafata umwanya wo gutekereza uko babyitwaramo igihe ibihe by’umunezero barimo byazamo kidobya.

 

Ibi ariko ni ukwirengagiza ko mu buzima hari ibintu bibaho bitabanje guteguza nk’urupfu n’indwara. Ni byiza ko rero iteka uhora witeguye ukamenya uburyo uzabyitwaramo igihe ikintu nk’iki kikubayeho.

Urubuga The Standard rugaragaza ko by’umwihariko mu gihe uwo mwashakanye afite uburwayi bukomeye, ukwiye kugira intwaro witwaza kuko uretse kuba bituma ubasha kumwitaho uko bikwiye, bigira n’uruhare rukomeye mu buryo na we ubwe ahangana n’indwara afite.

Dore zimwe mu nama zagufasha:

Emera kandi uzirikane ko arwaye

Iyo umufasha wawe arwaye, ikosa rya mbere udashobora gukora ni ukwitwara nk’aho nta kibazo na kimwe afite. Ibi ariko sibyo, ugomba kuzirikana ko afite ububabare ndetse ukibuka ubwoba buri wese aba afite iyo ahuye n’indwara.

Gusobanukirwa n’uburwayi bwe, kuzirikana ububabare afite bituma wisanisha na we, ku buryo bikorohera kumuba hafi, na we bigatuma abona imbaraga zo gukomeza guharanira kudaheranwa n’indwara kuko aba azi neza ko hari uwo bafatanyije mu rugendo.

Gerageza kumuba hafi

Igihe uwo mwashakanye arwaye, ni byiza ko ukora ibishoboka ukamuba hafi kuko bituma yumva yitaweho kandi akunzwe hatitawe ku gihe bizatwara ngo abashe gukira neza.

Mwereke ko uko byagenda kose muri kumwe kandi nubwo waba ufite ibindi bintu bikomeye ugomba guhangana na byo nk’amafaranga yo kumuvuza cyangwa izindi nshingano z’urugo, gerageza kubimuganiriza mu buryo bworoheje, utamweretse ko hari uruhare na ruto abifitemo dore ko n’indwara aba atari we wayikururiye.

Gerageza gushyira mu bikorwa inshingano ze n’izawe

Igihe uwo mwashakanye arwaye, kimwe mu bishobora kumushimisha ni ukubona ushyira umuhate mu gushyira mu bikorwa inshingano ze n’izawe, kabone nubwo biba bitoroshye.

Niba mufite abana ntibagomba kubura ubitaho, guhaha cyangwa kwishyura ibintu mukenera ngo bibe ikibazo ndetse usange n’isuku yo mu rugo yarangiritse.

Gerageza byose ubitunganye uko ushoboye kandi utinuba, wirinde guha uwo mwashakanye impamvu yo guhangayika kuko bishobora gutuma arushaho kuremba.

Wikwibagirwa kwiyitaho

Bibaho cyane ko iyo umuntu ukunda arwaye, ufata umwanya wose ukawumuharira, ku buryo ushobora no kugera ubwo wibagirwa ko nawe ukeneye kurya, kwigirira isuku no kuruhuka.

Burya ariko iyo uwo mwashakanye arwaye, yego ni byiza ko ufata umwanya wo kumwitaho uko bishoboka ariko ntiwibagirwe ko ukeneye gukomeza kubaho ndetse n’abandi bo mu muryango wawe.

Fata umwanya uruhuke, ugerageze gushyira mu bikorwa izindi gahunda zirebana n’ubuzima bwa buri munsi kuko bigufasha gufata ingamba zikurinda kuba wahura n’ibibazo bitandukanye birimo guhangayika n’agahinda gakabije.

Ihanganire imyitwarire ye

Birashoboka cyane ko uwo mwashakanye ashobora guhindura imyitwarire kubera uburwayi, ugasanga aravuga nabi, ikibaye cyose agahita arakara cyangwa agashaka kugaragaza ko utamwitaho uko bikwiye.

Uko byaba bigoye kose, gerageza kumwihanganira uzirikane ko atari we, ahubwo byose ari kubiterwa n’ububabare afite, cyangwa se kwiheba yumva ko atazakira.

Witinya gusaba ubufasha

Nta kosa na rito ririmo kuba igihe wumva uburwayi bw’uwo mwashakanye bukurenze, by’umwihariko ku bagabo, kuba wakwitabaza inshuti n’umuryango.

Bashobora kugutiza amaboko mu gukora imirimo imwe n’imwe yo mu rugo, kwita ku bana ndetse n’ibindi, bityo nawe ukabasha gushyira mu bikorwa izindi nshingano zituma ubuzima bw’umuryango budahagaragara kubera ko uwabigufashagamo arwaye.

Ntukwiye kandi gutinya gusaba inama abanyamwuga cyane cyane igihe uwo mwashakanye afite uburwayi budakira kuko uretse kugutega amatwi, baguha intwaro ituma ubasha gukomera, no gushyira mu bikorwa inama zose zavuzwe hejuru.

Uwineza Vanessa@Rwandapaparazzi.rw

53,480 total views, 50 views today

About Rwanda Paparazzi

RwandaPaparazzi Author

ăn dặm kiểu NhậtResponsive WordPress Themenhà cấp 4 nông thônthời trang trẻ emgiày cao gótshop giày nữdownload wordpress pluginsmẫu biệt thự đẹpepichouseáo sơ mi nữhouse beautiful