Templates by BIGtheme NET

Ese niyihe Mpamvu Ituma Abagabo Bakubitwa n’ Abagore Babo Bakaryumaho mucyimbo cyo Kubarega “INKURU”

Bimenyerewe ko abagabo ari bo bakunze guhohotera abagore ariko ibintu bigenda bihindura isura aho abagore bamwe bakubita abagabo babo ariko ababikorerwa baryumaho kubwo gusigasira icyubahiro mu muryango no kwanga kwiha rubanda.

Bamwe mu bagabo ngo bakubitwa n’abagore nijoro, hakaba abakubitirwa imbere y’abana mu gihe hari n’abavuga ko bakorerwa ibindi bikorwa byo kubatesha agaciro no kubahima ntihagire uwo bahingukiriza iryo hohoterwa.

Umwe mu bagabo bo mu Karere ka Musanze wifuje ko amazina ye atavugwa muri iyi nkuru yatangarije itangazamakuru ko amaze imyaka myinshi akubitwa n’umugore.

Yagize ati “Umugore wanjye ni ingare, iyo tugize akantu gato tutumvikanaho njya kumva nkumva yankubise urushyi. Tumaranye imyaka 20 arankubita ngaceceka nkanga kwiha rubanda. Si uko andusha imbaraga ahubwo njye narahiye ko ntazigera ndwana n’umugore.”

Undi mugabo wo mu Karere ka Gasabo ati “Umugore wanjye yigeze kunkubita mu maso y’abana ndacece kuko nabonaga ko nimukubita abana bari buhungabane. Ubundi yankubise turyamye na bwo ndaceceka mbura icyo nkora. Narebye kujya kumurega nsanga byaba bigayitse cyane kumva ko umuntu w’umugabo nkubitwa n’umugore.”

“Umugabo wajya kurega umugore ngo yamukubise ntiyaba ari umugabo”

Mu myumvire y’abagabo batandukanye baganiriye n’ itangazamakuru, bavuze ko kurega mu muryango cyangwa mu buyobozi umugore wakubise umugabo ari igisebo.

Hari uwagize ati “Kujya mu buyobozi ni ukwiha inkwenene, ni ugutakaza agaciro mu muryango. Njye natandukana na we nkaguma mu nzu kubera inyungu z’abana.”

Umuryango uharanira guteza imbere ihame ry’uburinganire n’ubwuzuzanye no kurwanya ihohoterwa rishingiye ku gitsina mu iterambere ry’Abanyarwanda, RWAMREC, uvuga ko ujya wakira abagabo batandukanye bavuga ko bakubitwa n’abagabo.

Mico Ntunga Patrick, umukozi w’uyu muryango yagize ati “Hirya no hino mu turere aho dukorera tujya twakira abagabo bafite ibibazo by’ihohoterwa bakorerwa n’abagore babo harimo n’abavuga ko babakubita. Icyo dukora ni ukubereka inzira banyuramo kugira ngo bahoshe ayo makimbirane nibiba na ngombwa banabigeze mu buyobozi.”

Akomeza avuga ko abagabo batumva ko bagomba kuregera ubuyobozi igihe bakubiswe n’abagore. Ati “Biragoranye cyane kugirango umugabo abe yajya kurega umugore we ngo yamukubise, ubona bagitsimbaraye ku kintu cy’umuco cyane, aho wasangaga umugabo ari umutware, ari umunyembaraga kandi ariwe uvuga ijambo rya nyuma mu rugo.”

Akomeza agira abagabo inama yo kudaceceka igihe bakubitwa n’abagore ngo kuko bishobora kubaviramo kubura ubuzima.

Imibare yatangajwe na Polisi y’u Rwanda muri Gashyantare 2017, igaragaza ko mu mwaka wa 2016, abantu basaga 64 bishwe n’abo bashakanye. Abagore bishwe n’abagabo babo bari 45, abagabo bishwe n’abagore babo basaga 19 mu gihe abagabo umunani n’abagore babiri biyahuye biturutse ku makimbirane yo miryango.

uwineza vanessa@Rwandapaparazzi.rw

15,680 total views, 20 views today

About Rwanda Paparazzi

RwandaPaparazzi Author

ăn dặm kiểu NhậtResponsive WordPress Themenhà cấp 4 nông thônthời trang trẻ emgiày cao gótshop giày nữdownload wordpress pluginsmẫu biệt thự đẹpepichouseáo sơ mi nữhouse beautiful