Templates by BIGtheme NET

Zapad 2017: Imyitozo ikaze y’ingabo z’u Burusiya muri Belarus, ihurizo rikaze kuri Amerika n’u Burayi>>

Ingabo zibarirwa hagati y’ibihumbi 60 ni 100 z’u Burusiya, hamwe n’iz’igihugu cya Belerus 13000, zirahurira mu myitozo ihambaye, iri ku rwego ruhanitse bitigeze kubaho mu mateka y’u Burusiya nyuma y’irangira ry’intambara y’ubutita ‘The Cold War’.

Ni imyitozo yo kuva ku wa 14 kugeza ku wa 20 Nzeri 2017,  yamaze guhabwa inyito ‘code’ yihariye “Russia’s Zapad 2017 Exercise”, ubwaryo ijambo Zapad ry’ikirusiya , risobanura“West”.

Iri zina rero rikaba ryarushijeho gutera umutima uhagaze ibihugu byo mu Burengerazuba bw’isi [Western Countries], byinshi muri byo, byibaza ko iyo code yahawe iyo myitozo, ari agasomborotso k’intambara, ko kandi iri zina risa n’iritwaye ubutumwa bw’intambara ikaze, u Burusiya bushaka gushoza ku Burayi na Amerika.

Kuva ubwo iyi myitozo yatangazwaga muri Werurwe 2017, ibihugu bisaga 29 bihuriye mu muryango w’ibihugu byiyemeje gutabarana bihuriye mu Majyaruguru y’inyanja ya Atlantic, NATO [ North Atlantic Treat Organisation], mu magambo arambuye y’icyongereza, birangajwe imbere na Leta Zunze Ubumwe za Amerika, byatangiye kwisuganya, hamwe no guterana amagambo n’u Burusiya, bibwihanangiriza ko niba iyi myitozo ititondewe ishobora gukora ibara.

Hamwe n’ibyo ariko, igihugu cya Belerus iyi myitozo izaberamo, cyahumurije ibihugu byo mu Burayi na Amerika, kinabisaba gushyitsa umutima hamwe kibyizeza ko nta kibazo kizava muri iyi myitozo.

Belarus kandi yanaboneyeho guha ikaze indorerezi za gisirikare z’igihugu cyose kibyifuza, cyane cyane umuryango wa NATO, wanahise wanzura koherezayo inzobere 3, gukurikirana umunota ku wundi iby’iyi myitozo, hagendewe ku masezerano yitiriwe OSCE’s Vienna Document, yemerera ibihugu kugenzurana mu bya gisirikare.

Zapad 2017 ngo yaba ari ubutumwa bw’intambara bweruye, u Burusiya bwoherereje NATO:

Ibiro ntaramakuru by’Abongereza Reuters, bwiza.com ikesha ibi, byanditse kuri iyi myitozo yitiriwe Zapad 2017, byemejwe ko iyi myitozo ariyo ikomeye ingabo z’u Burusiya zikoreye hanze y’igihugu, ihuje ingabo nyinshi ,kuva intambara ya 2 y’isi n’iy’ubutita zarangira.

Ingabo ibihumbi 100 hamwe n’iza Belarus 13.000 ngo ubusanzwe ni umubare w’ingabo zijya ku rugamba, si umubare wakabaye uhurira mu myitozo isanzwe, ihuza ibihugu.

Ikigo The Warsaw besed Centre for Eastern Studies kiri i Valsovie, mu murwa mukuru wa Pologne, cyazobereye mu by’umutekano cyatangaje ko nta kurya iminwa ko iyi myitozo ya Zapad 2017 ari  “Ubutumwa bweruye bw’intambara u Burusiya bwoherereje umunyango wa NATO”.

Ubusanzwe igihugu cya Belarus ni umunyamuryango w’ibihugu bihuriye ku gutabarana uhuza Aziya n’u Burusiya CSTO [ The Collective Security Treaty Organisation ], ugwiriyemo bimwe mu bihugu byahoze bigize Republika Zunze Ubumwe z’Abasoviyeti , uyu muryango ukaba uterwa inkunga n’u Burusiya, ariko muri uyu mwaka wa 2017 ,ukaba uyobowe na Belarus.

Zapad rero, hamwe na operasiyo yitwa Shchit Soyuza ni imwe mu myitozo ikunze guhuza ingabo z’ibi bihugu byombi, mu buryo busimburana bw’aho ibera, igihugu kimwe kikayakira, ubutaha kigaharira ikindi, gutyo gutyo.

Iyi myitozo rero ikaba ikurikiza amasezerano mu byo kurwaniriza umwanzi hamwe, hagati ya Leta y’u Burusiya na Belarus, byagiranye muri Nzeri 2009. Zapad iheruka ikaba yari yarabaye mu 2013.

Kuri iyi ncuro, iyi myitozo yari yemejwe n’abaperezida, Alexander Lukashenko ku wa  20 Werurwe 2017, mucyo yise ‘’Guhuriza hamwe imbaraga z’ingabo za Belarus”, mu rwego rwo gushimangira umutekano w’igihugu cye cya Belarus.

Ingabo z’u Burisiya zitwa 1st Guards Tank Army zashinzwe mu 2014  ngo ziraba ziri muri iki gikorwa kandi. Izi ngabo ziraba zitwaje indege z’intambara zo mu gisirikare kirwanira mu kirere cy’u Burusiya, hamwe n’ibindi bikoresho bikaze, amato y’intambara, ibifaru n’ibindi.

Muri ibyo byose ariko NATO na Suede ntibicaye ubusa:

Ubwo iki gikorwa cy’ingabo z’u Burusiya na Belarus cyatangazwaga, ibihugu by’inkwakuzi bihuriye ku muryango wo gutabarana wa NATO birimo n’Ubwongereza, byafashe iya mbere mu gutuma abasirikare gucungira hafi ibikorwa by’u Burusiya.

Ni muri urwo rwego muri Werurwe uyu mwaka, umunyamabanga mukuru wa NATO, Jens Stoltenberg mu gihe yasuraga ibikorwa by’ingabo z’Ubwongereza zikambitse muri Lithaunia, mu rwego rw’ingabo za NATO, yagize ati “NATO iracecetse, ariko iri maso bihagije”.. Ariko Minisitiri w’ingabo wa Lithuania Raimundas Karoblis  yahise asa n’umunyomoza.

Ati  “Ntitwakwihanukira ngo tuvuge ko dutuje burundu, kuko hari ingabo z’amahanga zitugose ku mpande zose z’imipaka yacu’’ ibi akaba yarabitangarije Reuters.

Jenerali Ben Hodges ni umugaba w’ingabo za Amerika ku mugabane w’u Burayi, yatangaje ko ibikorwa by’imyitozo u Burusiya bushaka gukora ari amaco yo gushaka uko bwacengera mu gihugu cya Pologne ,bwifashishije abaturage ba Pologne bavuga ikirusiya ,nkuko iki gihugu cyabikoze kigarurira intara ya Crimea kigaruriye ku ngufu, kiyambuye Ukraine .

Ibi rero u Burusiya bukaba bubikora bushaka uburyo bwacunga akarere kazengurutse inyanja ya Baltic, kabuhuza n’u Burayi bw’Iburasirazuba.

Igikomeje guhangayikisha NATO ariko ,uyu muryango washinzwe mu 1949 ,ni uko kugeza magingo aya u Burusiya bwerekanye ububasha butagereranywa bwo kuba burusha uyu muryango ingufu mu rwego rwo kwegeranya ingabo nyinshi mu gihe gito, ari nacyo u Burusiya bushaka kwerekana kuri iyi nshuro.

Ingabo ibihumbi 100 kuri NATO ,kuzegeranya  byonyine byabatwara igihe kitari gito, kuko NATO nubwo yagerageje kubaka ibitwaro birasa kure, hamwe n’ibihanura ibindi bisasu mu bihugu nka Turkiya, Estonia n’ahandi hakikije u Burusiya…

Ibi ntibyabujije u Burusiya nabwo kuzengurutsa amato y’intambara karundura mu Nyanja y’umukara no ku nkengero za Syria, mu rwego rwo kuba Moscow yabasha kurasa ku birindiro byose bya NATO nta kibaruhije.

Gusa n’ubwo bimeze bityo ngo NATO nayo iri kubaka umutwe w’ingabo ,uzaba ugizwe n’abasirikare ibihumbi 40 wabasha gukoma imbere ibitero byose byagabwa kuri kimwe mu bihugu binyamuryango byawo.

N’ubwo u Burusiya bukora ibyo, igihugu cya Suede ,ubusanzwe kitari umunyamuryango wa NATO ,kuri ubu kiri mu myitozo ikaze ,nacyo cyatumiyemo ingabo za Amerika, bugufi n’inyanja ya Baltic ndetse ingabo zikomeye z’u Budage n’u Bufaransa zikaba zagiye gufasha izi ngabo za Suede zikabakaba ibihumbi 25, mu rwego rw’uko Suede ihora yikanga ko u Burusiya bwayivogera nayo.

Mu byukuri kuba iyi myitozo iri kubera ahantu hegeranye,bikaba ari ibintu bikomeje gutera abantu ubwoba, kuko bishobora gutuma hari abasirikare bitoza, bikaba byavamo intambara ikaze, yahuza u Burusiya n’ibihugu bihuriye muri NATO, dore ko nabyo atari shyashya ,kuko bihora bishaka uko byakwiyegereza uduhugu twahoze turi ku Asoviyeti tutavuga rumwe n’u Burusiya, mu rwego rwo gushoboza NATO kubona uko icungira hafi ibikorwa by’u Burusiya.

U Burusiya nabwo buhora bugashaka ukuntu bwakwigarurira utwo duhugu, bukoresheje kurema imitwe y’ingabo zirwanya bene ibyo bihugu ,byanaba ngombwa ingabo z’u Burusiya zikajya zijyayo, zambaye imyenda itagira ibirango, zikahafata, zikahigarurira, nubwo ibi ntamakuru adafite aho abogamiye abyemeza.

Alex Masha@Rwandapaparazzi.rw

16,200 total views, 30 views today

About Rwanda Paparazzi

RwandaPaparazzi Author

ăn dặm kiểu NhậtResponsive WordPress Themenhà cấp 4 nông thônthời trang trẻ emgiày cao gótshop giày nữdownload wordpress pluginsmẫu biệt thự đẹpepichouseáo sơ mi nữhouse beautiful