Templates by BIGtheme NET

Mu Rwanda Hagiye gushyiraho ikigo cyigenga cyo guhangana n’ibitero by’ikoranabuhanga “INKURU IRAMBUYE”

Guverinoma y’u Rwanda iri gusuzuma uburyo bwo gushyiraho ikigo cyigenga kizajya gifasha mu guhangana n’ibitero by’ikoranabuhanga mu gihe bikomeje kwiyongera kandi bigakora no ku bihugu byinshi icyarimwe, narwo rukaba rukeneye gukaza ubwirinzi.

Umuyobozi Mukuru w’Ikigo cy’Igihugu cy’Ikoranabuhanga mu Itumanaho n’Isakazabumenyi (RISA), Innocent Muhizi, yabitangaje ubwo ikigo ayoboye cyahabwaha inshingano zirebana n’uburyo abaturage bakoresha ikoranabuhanga mu buzima bwa buri munsi, zabarizwaga mu Kigo cy’Igihugu cy’Iterambere (RDB) mu cyumweru gishize.

Nk’uko tubikesha The New Times, Muhizi yavuze ko gushyiraho ikigo gishya bizafasha mu kubaka ubushobozi igihugu gifite mu bwirinzi bw’ikoranabuhanga.

Raporo yakozwe n’Umuryango Mpuzamahanga w’Itumanaho (ITU), iheruka gushyira u Rwanda ku mwanya wa kabiri muri Afurika mu birebana no gucunga umutekano w’ikoranabuhanga, muri raporo yiswe Global Cyber security Index.

Iyi raporo igaragaza imbaraga igihugu cyashyize mu kugenzura umutekano mu ikoranabuhanga binyuze mu buryo bw’amategeko, tekiniki, kubaka ubushobozi bw’inzego ndetse n’ubufatanye mpuzamahanga, ariko Muhizi akazuga ko nta mpamvu yo kwirara.

Yagize ati “Umutekano w’ikoranabuhanga ni ikintu kinini cyane, guverinoma iri kureba uburyo hashyirwaho urwego rwigenga rwazaba rushinzwe umutekano w’ikoranabuhanga.”

“Hari urwego twifuza kugeraho mu bushobozi kugira ngo tubashe kubona no guhangana n’ibitero byose bishobora kuza. Ese dushobora kuvuga ko dufite umutekano uhagije? Oya.”

Yasabye ko hakomeza gukorwa ishoramari rifatika mu rwego rw’abikorera hagamije kurushaho kuzamura ubushobozi mu ikoranabuhanga, ab’inkwakuzi bakaba baratangiye kubyaza umusaruro amahirwe bafite mu ishoramari muri uru rwego.

Guverinoma iheruka gushyiraho Urwego rw’Igihugu rushinzwe umutekano w’ibijyanye n’ikoranabuhanga (NCSA), rufite inshingano zo kubaka ubumenyi n’ubushobozi by’umutekano w’ibijyanye n’ikoranabuhanga mu isakazabumenyi n’itumanaho.

Ubwo yagezaga ku Nteko Ishinga amategeko umushinga w’itegeko rishyiraho urwo rwego rikanagena inshingano zarwo, mu mwaka ushize Minisitiri w’Urubyiruko n’Ikoranabuhanga,Jean Philbert Nsengimana, yavuze ko u Rwanda rugabwaho ibitero bisaga 1000 by’ikoranabuhanga buri munsi n’ubwo bisuzibwa inyuma.

Icyo gihe yagize ati “Aha rero birasaba ko iki kigo kizagira ubushobozi buhagije, kikagira abantu b’inzobere, abo ngabo bita aba ‘Hackers’, byaba na ngombwa kikanabegera kikabakoresha, niba hari abo dufite mu Rwanda.”

Ikigo RISA nacyo kiracyari gishya, kikaba gifite inshingano yo kuyobora ishyirwa mu bikorwa rya politiki na porogaramu z’ikoranabuhanga mu itumanaho n’isakazabumenyi (ICT) bigamije kwihutisha iterambere ry’ubukungu n’imibereho y’abaturage kugira ngo u Rwanda ruhinduke Igihugu gifite ubukungu bw’abaturage bushingiye ku bumenyi.

Alex Masha@Rwandapaparazzi.rw 

3,060 total views, 10 views today

About Rwanda Paparazzi

RwandaPaparazzi Author

ăn dặm kiểu NhậtResponsive WordPress Themenhà cấp 4 nông thônthời trang trẻ emgiày cao gótshop giày nữdownload wordpress pluginsmẫu biệt thự đẹpepichouseáo sơ mi nữhouse beautiful